Urola Kostako Hitza

Hitzordu garrantzitsua izango dute piraguistek bihar arratsaldean herrian. Urola Ibaiaren XXXII. Igoera-Jaitsiera jokatuko da 17:30etik aurrera eta, urtero bezala, makina bat arraunlari elkartuko da Itxas-Gain Kirol Elkarteak antolatzen duen proban. Aurten, ordea, aurreko urteetan baino parte-hartzaile gutxiago izango duela aurreikusi dute antolatzaileek.

Dirudienez, Espainiako Piragua Federazioak azken orduko aldaketak egin ditu denboraldiko egutegian, eta duela aste batzuk Zaragozan bertan behera utzi zituzten probetako bat biharko antolatu dute, Urola Ibaiaren Igoera-Jaitsierarekin batera. Eta Zaragozakoa Espainiako Koparako puntuagarria denez, elkarte askok ezin izango dute Zumaian aritu.

Ohiko ibilbidea

Azken uneko aldaketek parte-hartzaileen kopurua gutxitu dezaketen arren, piragua lasterketa ohiko moduan jokatuko da. Probak ez du aldaketarik izango eta aurreko urteetan bezalaxe, 12 kilometroko ibilbidea osatu beharko dute piraguistek. Santiagoko hondartzatik abaituko dira 17:30ean, eta segidan, ibaian gora abiatuko dira guztiak, Joxe Mari Korta industrialdera iritsi arte. Beduako zubia pasa eta berehala topatuko duten buia inguratu ondoren, ibaian behera abiatu beharko dute Zumaia alderantz. Helmuga Arbustaingo arranparen parean jarriko dute.

Lasterketa lau kategoriatan eta modalitatetan banatuta dago, bai gizonezkoetan bai emakumezkoetan. Kategoriei dagokienez, kadeteek, jubenilek, seniorrek eta beteranoek hartu ahal izango dute parte. Modalitateak, berriz, honako hauek izango dira: K1 (piraguista bakarreko kayak-a), K2 (bi piraguistetako kayak-a), C1 (piraguista bakarreko kanoa) eta C2 (bi piraguistetako kanoa).

Zumaiako Udalaren laguntzarekin, Itxas-Gainek antolatzen duen proba Euskadiko Ibaietako X. Koparako puntuagarria da. Honakoa, gainera, azken aurreko proba izango da: aurretik, Plentziako Igoera-Jaitsiera eta Urumeakoa jokatuko dira. Txapelketako azken saioa etzi jokatuko da Irunen; Bidasoako Jaitsiera, alegia.

Nazioarteko gonbidatuak

Biharko proban parte hartuko duten piraguista gehienak Euskal Herrikoak izango diren arren, nazioarteko ordezkaririk ere izango da. Hain zuzen ere, Guildford herriko (Erresuma Batua) Wey Kayak Club elkarteko zortzi piraguista Zumaian izango dira. Duela aste batzuk Itxas-Gain elkarteko kideak Guildford-era gonbidatu zituzten eta orain, trukean, haiek gerturatuko dira herrira.

Itxas-Gain taldeko 26 lagunek parte hartuko dute aurtengo Urola Ibaiaren Igoera-Jaitsieran; besteak beste, Oier Aizpurua, Vicente Royo, Josu Ansola, Xabier Osa, Maialen Velarde, Ane Eizagirre eta Maite Amilibia ariko dira.