Urola Kostako Hitza

Izugarrizko ikusmina eta lehia sortu zen ostiral iluntzean Zestoako plazan. Bi taldek indarrak neurtu behar zituzten Giza Oroban, eta mila lagunetik gora bertaratu zen.

Lehen aldiz lehiatu zirenean ez bezala, oraingoan zestoarrak eta Zestoako Akua auzokoak lehiatu ziren eta azkenean zestoarrek irabazi zuten. 50 plaza egin zituzten, Akuako mutilek baino ia bi gehiago; azken horiek 48 plaza, 2 zinta, metro 1 eta 38 zm egin zituzten.

Herritarren txalo zaparrada artean eta xanpain botilak irekiz ospatu zuten garaipena zestoarrek, eta Akuakoek kiroltasun handiz zoriondu zituzten txapeldunak; datozen asteetan bi taldeek elkarrekin afaria egitekotan gelditu ziren. Gero txarangaren laguntzarekin jarraitu zuen festak.

20 eta 44 urte artekoak

Zozketa bidez erabaki zen zein taldek egingo zuen proba lehenbizi, eta horri esker Akuako taldearen ondoren egin ahal izan zuten proba zestoarrek.

Haiek 48 plaza pasatxo egin zituztela ikusita, marka hori gainditzen saiatu ziren zestoarrak, eta kostata, baina lortu egin zuten. Izan ere, bi taldeek oso nekatuta amaitu zuten proba, ikaragarrizko esfortzu fisikoa eginda. Bi taldeetako kideak sasoikoak izaki, ordea, inolako arazorik gabe errekuperatu ziren guztiak. Lehiakide gazteena nahiz nagusiena Akuako taldekoak ziren: batak 20 urte ditu eta besteak 44 urte.

Ikaragarrizko ikusmina

Mila sarrera baino gehiago saldu ziren ostiral gauean, bakoitza bost eurotan, eta bi taldeen artean banatuko da dirua. Zestoarrentzat izango dira bost eurotatik hiru, eurek irabazi zutelako proba. Ikusleak ez ezik, komunikabideetatik argazkilariak ere bertaratu ziren, eta mota honetako probetan ohikoa denez, baita artekariak ere; lau ibili ziren apustuak jasotzen.