Urola Kostako Hitza

Printzipioz, lehen erregional mailara igotzeko aukerak ihes egin dio Getariako Keta futbol taldeari. Edonola ere, jokalariak pozik daude euren estreinako denboraldiarekin; izan ere, duela urtebete sortu zuten elkartea.

Duela urtebete «paper zati» bat baino ez zirela gogoratu du Getariako Keta futbol taldeko jokalari eta kapitain Iosu Mujikak: «Orain, ordea, talde sendo bat gara, eta herritarrek gertutik jarraitzen gaituzte. Hasieran ilusio bat zena mamitzen joan da, errealitate bihurtu arte. Poztasun hori ez digu inork kentzen». Estreinako denboraldia jokatu dute aurten bigarren erregional mailan, eta gutxigatik bada ere, ez dute maila igotzeko txartela lortu.

Duela bi asteburu 2-1 galdu zuten getariarrek Aretxabaletan, igoera faseko promozioko lehen partidan. Joan den larunbatean, itzuliko partidan, emaitza berarekin bukatu zen partida, baina oraingoan getariarrak nagusitu ziren. Bi neurketetako emaitzak kontuan izanda, berdinketa batera iritsi zirenez, luzapena jokatu behar izan zuten eta, azkenean, penaltietan erabaki zen igoera. «Penaltietan aurkariek guk baino gol bat gehiago sartu zuten eta kanporatu egin gintuzten! Honaino iritsi ondoren, desiratzen genuena ez lortzea pena izan da», aitortu du taldeko kapitainak.

Aukera bat, oraindik

Edonola ere, itxaropen txiki bat badago oraindik. Hain justu ere, hirugarren mailara igotzeko promozioko partida jokatzen ari dira Gipuzkoako, Bizkaiako eta Arabako gorengoen mailako talde onenak. Bertan parte hartzen duen Donostiako Berio taldeak kanporaketa irabaziko balu, mailaz igoko litzateke eta, ondorioz, Ketak lehen erregional mailan jokatzeko txartela lortuko luke.

Aukera hori egia bilakatuko den, ordea, hurrengo asteburuan jakingo dute getariarrek: kanporaketa bukatzen denean, alegia. Hori guztia jakin arren, taldea lasai dagoela adierazi du Iosu Mujikak. Izan ere, «azken aukera hori hor dago, bai, baina ez dago gure gain. Guk, behintzat, gure esku zegoen guztia egin dugu eta gustura gaude».

Maila handiko multzoa

Bigarren erregional mailaren izaera asko aldatu dela nabarmendu nahi izan du Ketako jokalariak: «Garai batean, lagunez osatutako taldeak aritzen ziren lehian, baina pixkanaka-pixkanaka perfekzionatzen joan da guztia. Adibidez, gorengoen mailan dabiltzan hainbat talde beheko taldeak sortzen ari dira, lehen taldean lekua ez duten jokalariei irteera emate aldera. Bi talde horien arteko ezberdintasuna ahalik eta txikiena izaten saiatzen dira, gainera».

Getariarrak gisa horretako taldeen aurka neurtu dira estreinako denboraldi honetan, baita iaz lehen erregional mailatik jaitsi eta igoeraren bila zihoazenen aurka ere. «Gure multzoan, Kostkas eta Ostadar ziren faboritoak eta, azkenean, beraiek baino hobeto bukatu dugu. Ondorioz, taldea sortu genuenean ezarri genituen helburuak sobera bete ditugu».

Datorren denboraldia

Partidak jokatzeari utzi badiote ere, datorren denboraldiko plangintza zehazten hasi dira jada. Aurtengo jende beretsuak jarraituko du futbol taldean: «Aurten ilusio handiz aritu gara eta ikusi noraino iritsi garen, inolako denboraldi aurreko saiorik egin gabe. Aurtengo giroari eutsi eta hobeto prestatzen bagara, datorren urtean igoera lortu dezakegula uste dut», azaldu du Iosu Mujikak.