Urola Kostako Hitza

Amenabar eraikuntza enpresaren egoitzan lehergailu bat zartarazi zuen ETAk joan den igande goizaldean. Hiru lagun zauritu ziren eztandaren eraginez eta igandean bertan Udaleko Bozeramaileen Batzordeak «irmoki» gaitzetsi zuen erasoa. Izan zen beste erreakzio politikorik ere eta atzo iluntzean, salaketa gisa, elkarretaratzea egin zuten udaletxe aurreko plazan.

Danbatekoa eta zaurituak

Larunbat goizaldeko 01:30ak aldean emakume batek deitu zuen Gipuzkoako DYAren bulego nagusira. Bertako langileek atzo HITZA-ri baieztatu ziotenez, deitu zuen emakumeak «ETAk jarritako lehergailu batek ordubete barru eztanda» egingo zuela adierazi zuen. Hori jakin bezain laster, Ertzaintzaren hainbat auto eta furgoneta joan ziren Amenabarrek Nafarroa kalean duen egoitzara eta eremu guztia itxi zuten. 02:40an, lehergailuak eztanda egin zuen beirazko aurrealdea duen egoitzaren atarian.

DYAk eta Herrizaingo Sailak zabaldutako informazioaren arabera, hiru lagun zauritu ziren leherketaren ondorioz. Batetik, bi ertzainen tinpanoak kaltetu zituen eztandak, eta bestetik, Amenabarren eraikinetik 50 metro ingurura zegoen beste herritar bati ebakiak egin zizkioten kristalek aurpegian. Dena den, zauritutako hiru lagun hauetako inor ere ez zuten ospitalera eraman behar izan.

Lehergailua egoitzaren aurrealdean jarri zuten, motxila batean sartuta. Herrizaingo Sailak helarazitako datuek zehazten dutenez, hiru eta bost kilo artean zituen lehergailuak, eta denbora kontrolatzeko sistema bat ere bazeukala gaineratu dute.

Konponketak eta itzulera

Amenabar eraikuntza enpresaren aurrealdean kokatu zuten lehergailua eta kalterik nabarmenenak eraikinaren beheko aldean egin zituen eztandak; hain zuzen ere, bilera gela zegoen parean eragin zituen txikiziorik handienak. Horrez gain, kalte materialen artean, eraikinaren aurrealdeko kristal handietako bat ere apurtu zuen.

Igande arratsaldean, oraindik kristalak eta egitura zatiak ikus zitezkeen lurrean barreiatuta. Astelehen goizean, ordea, lanera itzultzeko mementoa iritsi zen. Beira zatiak, egitura eta harlauzak bildu ondoren, zuloa estaltzeko egurrezko egitura egiten hasi ziren arotzak. Barruan, berriz, lanera itzuli ziren Amenabarreko langileak. Dena den, enpresako kideek ez zuten inolako adierazpenik egin nahi izan, kalteak zenbaterainokoak izan diren, noiz neurtuko dituzten, edo erasoari buruzko zer-nolako irakurketa egiten duten adierazteko.

Erreakzio politikoak

Udaleko bozeramaileek presazko bilera egin zuten agiria adosteko. Eusko Jaurlaritzak galdera bat egin zuen gaitzespenarekin batera: «Ideiak herri zibilaren kontra lehergailu bidez defendatzen dituztenek nolako gizartea eraiki nahi dute?». Espainiako Gobernuak EAEn duen ordezkari Mikel Cabiecesen esanetan, berriz, «indarkeriak ez du geldituko euskal gizartearen aurrerabidea».

Politikari eta komunikabide askok Abiadura Handiko Trenaren eraikuntza lanekin lotu dute erasoa. Duela hiru aste ere Amenabarren hondea makinak erasotu zituzten. Dena den, oraindik inork ez ditu aldarrikatu eraso hauek AHTren aurkako ekintza gisa.