Urola Kostako Hitza

Jendea ez zen etxean gelditu atzokoan Getarian. Euskal Jai eguneko goiza triste hasi zen, eguraldi txarrarekin eta jende gutxirekin, baina orduak pasa ahala eguraldia argituz joan zen eta getariarrak eta bisitariak ere ezkutalekuak utzi eta kale erdira agertu ziren.

Goiza Getariako txistularien eta Goiz Soinuaren laguntzarekin esnatu zen atzo, eta eguerdia bitartean dultzaineroekin kalejira, txikientzako idi-busa eta azoka egon ziren. Dena dela, eguerdi partean hasi zen pilatzen jendea herriko erdigunean; batzuk baserritar jantziekin bete zituzten tabernak, eta beste asko Harritartera hurbildu ziren ardi txakurrek antzarrak eta ahateak nola menderatzen zituzten ikustera. Hiru txakur aritu ziren lanean, tartean Jexux Larrañaga zarauztarraren Zeru.

Ia 200 kilo sardina

Plaza inguruan, berriz, gose edo egarri zenarentzat 190 kilo sardina eta 750 litro sagardo zituen prest Udalak. Herriko 20 elkartetako eta eragiletako boluntarioak ibili ziren jo eta su sardinak prestatzen, banatzen eta txotxeko sagardoa ateratzen. Bi euroren truke zortzi sardina eta nahi adina sagardo eman zutenez, arrakasta ederra izan zuen ekimenak.

Dantzarako prest

Eguerdi partean ekimen bat bestearen atzetik etorri zen. 13:00etan, esaterako, herritarrek dultzaineroen laguntzarekin dantzatzeko aukera izan zuten udaletxe aurrean. Baserritarrez jantzita gehien-gehienak, Larrain dantza ehunka herritarren aurrean dantzatzera animatu ziren. Irrintzi lehiaketa egon zen ondoren; sei herritarrek hartu zuten parte eta Erika Larrañaga izan zen garaile.

Arratsaldetik aurrera, musika

Arratsaldean jarraitu zuen festak, eta musika izan zen protagonista nabarmenena. Aurrena Trikitilari Gazteen Getariako IX. Txapelketa egin zuten; hamaika parte-hartzaile aurkeztu zirenez, atzokoan kanporaketa egin behar izan zuten txapelketaren aurretik. Edizio honen amaieran txapelketa amaitu gabe zen oraindik. Ondoren bertso-triki-poteoa egon zen Hamaika Bertute taldekoekin, herriko bertso eskolako bertsolariekin eta Saioa eta Alabier trikitilariekin. Eguna amaitzeko Tapia eta Leturiarekin erromeria egon ziren.