Urola Kostako Hitza

Joan den asteburuan Surf Elkartearen urteurrena ospatzeko egin zituzten ekitaldiak «ondo eta gaizki» joan zirela esan zuen atzo Iban San Martin elkarteko kudeatzaileak. Ondo, normaltasunaren barruan joan zirelako ekimen gehienak; baina, gaizki, igandeko eguraldi kaskarraren eraginez Surf Txapelketa Herrikoiko finalak jokatu gabe gelditu zirelako. Maila guztietako finalak larunbat honetara atzeratzea erabaki zuten.

Guztira, herriko 150 surflarik hartu zuten parte txapelketan, metro eta erdiko olatuekin. Master, senior, 18 azpiko eta open mailetan sailkatu zirenek larunbat goizean izango dute hitzordua finalak jokatzeko. Open mailan, esaterako, izen ezagun asko ikusi ahal izango dira: mutiletan Hodei Collazo, Ander Ederra, Oier Illarramendi eta Markos Sansegundo izango dira; nesketan, berriz, Lore Eizagirre, Myrian Imaz, Edith Sansegundo eta Ainara Aymat.

Ospakizunak, ondo

Txapelketako eragozpenez gain, herriko surfaren historiari buruzko mahai-ingurua ere bertan behera utzi behar izan zuten, «jendea ez zelako animatu».

Gainerakoan, urteurreneko ospakizunak eta ekimenak ondo joan ziren. Argazki lehiaketa Imanol Sorazuk irabazi zuen eta bideoen atalean Mikel Leyun nagusitu zen. Bestalde, larunbat gauean egin zuten afarira 152 lagun joan ziren, eta ondoren, Underneed talde donostiarraren musikaz gozatzeko aukera izan zuten.