Urola Kostako Hitza

Mattin Saldiasek bederatzi urte zituenetik gidatzen ditu kart autoak eta urte gutxian abilezia handia lortu du. Gaur egun, M2 Racing taldeko kidea da eta karting lasterketetan hartzen du parte. Asteburuan, hitzordua du Katalunian.

Txikia eta ziztu bizian ibiltzen dena, micromachine baten antzekoa. Halakoxea da Mattin Saldias auto gidaria (Zarautz, 1994). 9 urte zituenetik autoko bolanteari kateatuta dabil, eta gaur egun, batetik bestera ibiltzen da karting lasterketetan lehiatzen. Orain 13 urte ditu, M2 Racing Karts taldeko gidaria da, eta datorren asteburuan hitzordu garrantzitsua izango du Kataluniako karting txapelketan.

Gaztetxoa izanda, oraindik oinarrizko ikasketak egiten ari da eta lasterketaren batera joan beharra duenean Lizardi Institutuan baimena eskatu behar izaten du. «Beti uzten didate», zehaztu du bere ahots apalarekin. Kataluniara bihar abiatuko da, eta egin beharreko lanak eginda, igandean itzuliko da berriz etxera, astelehenean eskolara joateko.

Iaz, urte emankorra

Mattin Saldias 9 urterekin hasi zen kart autoak gidatzen. Alokairuan hartutako autoekin ez zuen askorik iraun, «gutxi korritzen zutelako», eta erosi egin zuten bat. Olabarriako zirkuituan ekin zion entrenamenduei eta lehenbiziko neurketa iaz izan zuen Alcañizen (Teruel, Espainia). Hirugarren gelditu zen eta Bilboko Aga Racing taldean sartu zen handik gutxira. 12 eta 15 urte arteko gaztetxoen KF3 kategorian hartzen du parte eta iazko denboraldian sari ugari irabazi zuen: txapeldunorde gelditu zen Kantabrian (Espainia), Nafarroan, Challenge Norte lasterketan eta Mast Karting lehiaketan.

Bilboko taldea utzi egin zuen eta aurten Kataluniako M2 Racing taldean «hobeto» dabilela dio. Eta ezer gehiago esateko astirik gabe azkar batean joan egin behar izan du, eskolako txirrinak jo du eta.