Urola Kostako Hitza

Elkartasunez presoak herrira, Euskal Herria Askatasuna behar du! lelopean egingo da, datorren maiatzaren 31n, VIII. Elkartasun Eguna. Urtero moduan, Azpeitiko Amnistiaren Aldeko Mugimenduak egun osorako egitaraua antolatu du, presoei eta iheslariei elkartasuna adierazteko.

Jendetza bildu zen, atzo, Frontoi Txikin, ekimena jendaurrean aurkezteko. «Azpeitiko preso eta iheslariak herrian sentitu daitezen, gure elkartasun eta berotasun handiena eskainiko diegu larunbatean», adierazi zuten mugimenduko kideek. Gainera, AAMren kontrako epaiketan auzipetuta dauden 27 lagunei ere babesa emango diete.

Urtetik urtera, hainbat herritarren elkartasun konpromisoa gero eta zabalagoa izatera heldu dela adierazi zuten, «mugimendu indartsu bat» sortuz. «Konpromisoz beteriko mugimendu hori da isildu nahi dutena Madrilen burutzen ari diren epaiketaren bidez», azaldu zuten. Alferrik ari direla ere esan zuten, «Amnistiaren Aldeko Mugimenduaren olatua geldiezina» delako.

Krosa eta bazkaria

Elkartasun Krosak eta herri bazkariak bilduko du jende gehien datorren larunbatean. Hori dela-eta, ekimenetan parte hartzeko aurretik izena emateko aukera eman dute.

Sei kilometroko lasterketan ateratzeko dorsalak salgai daude Aradi kirol dendan, igerilekuan eta Orkatzen. Aurretik eskuratuz gero, 6 euro ordaindu beharko dira, eta egunean bertan, 8 euro.

Bazkarirako txartelak Orkatzen, Txarrantxan eta Jim Clarcken salduko dituzte aurretik, 15 eurotan (langabetu eta ikasleentzat, 12). Egunean bertan ere salduko dira, 18 (langileentzat) eta 12 eurotan (ikasle eta langabetuentzat).