Urola Kostako Hitza

Oiana Blanco judoka oriotarrak garaipenak lortzen jarraitzen du. Izan ere, Espainiako Judo Liga irabazi du joan den asteburuan JC Usurbil taldearekin. Garaipenak «guztiak ezustean» harrapatu dituela aitortu du, eta egindako lanarekin «oso gustura» agertu da.

Maila altuko taldeak

JC Usurbil taldeak aurrenekoz hartu du parte Espainiako Ligan, eta Blancok adierazi duenez, inork ez zuen espero eurek irabazterik: «Hasierako helburua aurreneko lau onenen artean gelditzea zen, eta garaipenak ezustean harrapatu gaitu, bai gu bai beste taldeak».

Oriotarraren taldeak 10 puntu eskuratu ditu Ligan, bigarren egin duen JC. Alicante taldeak baino bat gehiago. Blancoren ustez «talde indartsuak» lehiatu dira Ligan; gainera, batzuek Olinpiar Jokoetan parte hartzen duten jokalariak dituzte. Hala ere, talde indartsuenek «beste taldeak gutxietsi» dituztela iruditzen zaio Blancori: «Talde horietako batzuk behintzat Liga hasieran ez zuten taldekide indartsuenekin jokatu, eta gu, beraien harridurarako, garaipenak lortzen aritu gara hasieratik». Ezustean izan bada ere, «oso gustura» agertu da garaipen honekin.

Orain burua Brasilen du Blancok, ekainaren hasieran hara joango baita Espainiako federazioarekin. Ekainaren 21ean, berriz, Cubako eta Euskadiko selekzioak lehiatuko dira Usurbilen.

Mutilek seigarren egin dute

Beste bi oriotarrek ere hartu dute parte Espainiako Ligan; Ibai Peñak eta Xabier Urkizuk ere JC Usurbil taldearekin jokatu dute eta seigarren postua lortu dute. Peñak adierazi duenez, euren hasierako helburua «dominaren bat lortzea» zen, baina «lesio garrantzitsuak» ere izan dituzte eta azkenean «emaitza txukuna» lortu dutela adierazi du.