Urola Kostako Hitza

«Guztiaren gainetik, txapeldun handia zen Urtain eta, batik bat, gizon zintzoa eta ona»

juan luis torralbA ð- Euskal Herriko Boxeo Federazioaren lehendakaria

Kirola

Boxeo gaietan aditua da Torralba, eta atzera begiratu eta Urtaini eta bere gaitasunei buruz hitz egin du

irene elorzA

Juan Luis Torralba (Villa Del Río, Cordoba, Andaluzia, 1936) 56 urte daramatza boxeoari lotuta. Amateur mailan boxeatu ondoren, Boxing Club Vitoria gimnasioa ireki eta boxeoari lotuta lan egin du bizi osoan zehar. Orain 18 urtetik Euskal Herriko Boxeo Federazioaren lehendakaria da eta 1998. urtetik Europako Boxeo Elkartearen (EBA) buru ere bada.

Nola definituko zenuke Urtainen figura?

Nik, tamalez, ez nuen Urtain asko ezagutu, baina urrutitik jarraitzen nuen eta boxeoan aparteko pertsonaia zela ikusten nuen. Ez zen ohiko boxeolaria, baina hala ere jendetza erakartzen zuen. Kirol fenomeno bat zen. Boxeolari profesional moduan egin zuen garaian, jende asko erakartzen zuen eta joaten zen toki guztiak betetzen zituen. Europako Txapelduna izatera iritsi zen. Gipuzkoan oso inportanteak ziren bi pertsonaien eskutik joan zen: Lizarazurekin eta Almanzorrekin, hain zuzen. Urtainen kontseilariak ziren, eta haiek eraman zuten Europako titulura. Handik aurrera, nik dakidanez, independizatu egin zen eta bere ibilbidea bakarrik egitea nahi izan zuen.

Nolako boxeolaria zen?

Figura bitxia zen benetan. Oso potentea zen, oso indartsua eta gaitasun askokoa. Atleta bat zen, baina teknikoki ez zen oso ona. Hala ere, txapeldun izateko gaitasunak zituen. Kontua da oso ibilbide azkarra eginarazi ziotela, zeukan adinagatik bere kontseilariek presa baitzuten. Harriak jasotzetik zetorren eta berandu hasi zen boxeatzen. Horrek teknika kontuetan atzeratuta ibiltzea ekarri zuen. Baina, guztiaren gainetik, txapeldun handia zen eta, batik bat, gizon zintzoa eta ona.

Boxeoan garai onak ziren haiek, ezta?

Garai hartan boxeoa oso kirol garrantzitsua zen. Urtainekin batera beste figura batzuk zeuden (Carrasco, Legrá, Velazquez eta beste batzuk) eta guztien artean Espainiako boxeoaren urrezko aroa egin zuten. Telebistan ere hasi ziren boxeoa ematen. Geroago, Gobernuak gelditu egin zuen hori eta orduan hasi zen boxeoaren gainbehera. Orain boxeoan inbertituko duten telebistak lortu behar dituzte sustatzaileek. Boxeoa jendetzari zuzendutako ikusizuna da, ez dut zalantzarik. Afizio handia dago eta horren froga da Euskal Telebistaren Boxeo Izarrak saioa: 15 urte daramatza eta ikusle asko ditu. Nahikoa da telebista batek boxeoa produzitzeko erabakita hartzea, 1 Formularekin gertatu den bezalaxe.

Eta nolakoa da gaur egungo egoera?

Gaur egun, garai guztietako boxeolaririk garrantzitsuena daukagu, errekor guztiak hautsi dituena: Javier Castillejo. Zazpi aldiz irabazi du Munduko Txapelketa. Hala ere, apenas entzuten da boxeoa Espainian, telebisten babesa falta baitzaigu. Ez dute ezer inbertitzen boxeo produkzioetan.

Alemanian edo Erresuma Batuan kontrakoa gertatzen da eta, gaur egun, boxeoak herrialde hauetan AEBetan baino garrantzi gehiago izatea lortu du. AEBetako boxeoaren hegemonia gainbeheran dago. Europa ekialdeko boxeolariak profesional mailan jokatzeko aukera dute orain, eta onenak bertatik ateratzen dira.

Urtainek 1970eko Europako Txapelketa irabazi zuenetik asko aldatu al da kirol hau?

Ordutik hona kirola mantendu egin da. Boxeoak bi aurpegi ditu: batetik, ikuskizun handia da; eta bestetik, kirol olinpikoa ere bada. Euskal Herrian orain 10 urte baino afizio handiagoa dago, eta gimnasioak boxeoan trebatzen ari diren lagunez beteta daude. Boxeoa, borroka arteak eta kickboxing-a nahasten ari dira. Boxeo olinpikoa beti mantendu izan da, baina ikuskizun-boxeoa egiteko dirua behar da, oso garestia baita. Izan ere, boxeolari profesionalek dirua irabaztea behar dute, sakrifizioz betetako jarduna baita. Entrenamendu trinkoa eta sendoa behar da eta hori ondo ordaindu behar da, bestela ez dago boxeolaririk.

Boxeoaren aurka dagoen jendea ere bada; zer iruditzen zaizu?

Ez dutela boxeoa ezagutzen. Federazioak kirola gizarteratzeko lan handia egiten ari gara, gazteei bizimodu osasuntsua erakutsiz.