Urola Kostako Hitza

Eskualdean, Alkoholiko Anonimoen eta Al-Anon Alkoholikoen Senideen hainbat talde daude; Zumaiako aipatutako bi elkarteek alkoholari nola egiten dioten aurre azaldu dute.

Alkoholismoa gaixotasun bat da. Estigma bat balitz bezala, bizitza osorako izaten da; izan ere, «alergia moduko zerbait da eta kalte egiten digu». Horrenbestez, gaixoek tratamendu bat jarraitu behar izaten dute alkoholari aurre egiteko: lehenik eta behin, ez edatea; eta bestetik, Alkoholiko Anonimoen bileretara joatea. «Bileretara etortzen gara, botila itxita eduki behar dugula konturatzeko eta edanari ematera zerk bultzatu gaituen jakiteko», azaldu dute Zumaiako Arritokieta Alkoholiko Anonimoetako kideek.

Alkoholiko Anonimoetan barneratzeko baldintza bakarra, alkohola utzi nahi izatea da. Bileretan alkoholari buruz, kide bakoitzaren egoerari buruz eta aurre egiteko neurriei buruz hitz egiten dute. Horretarako literatura deitzen dioten gida bat jarraitzen dute, «gure helburu nagusia edan gabe egotea eta gaixoari edan ez dezan laguntzea da eta».

«Nahi baduzu, utz dezakezu»

Alkoholiko baten arazoa ulertzeko pertsona egokiena beste alkoholiko bat dela diote: «Besoak zabalduta hartu ninduten atetik sartu nintzen egunean. Maitasuna emateaz gain, lagundu nahi nindutela ikusi nuen hasieratik. Nahi banuen, alkohola utzi nezakeela esan zidaten eta, egia esan, bileretara etortzea eta elkarteko adiskideen babesa jasotzea lagungarri egin zitzaidan. Ondorioz, gugana lehen aldiz datorrena gu hartu gintuzten bezala hartzeko prest egon behar dugu».

Bileretan kide bakoitzaren egoera «entzuten eta ulertzen» dute eta hori «pribilegio handia» da gaixoentzat: «Tabernetan, ordea, ez zaituzte kontuan hartzen, 'mozkor hau berriro ere tontakeriak esaten hasi da' esanez. Jakina, 30 euro poltsikoan dituzun bitartean, denak dira zure lagunak. Baina sosik gabe geratzen zarenean, inork ez du zutaz ezer jakin nahi».

«Kalean bat gehiago zinen», gogora ekarri du kideetako batek: «Batzuetan, herriko xelebrea eta beste batzuetan, zabor hutsa. Bileretara etorri eta edana utzi ondoren, ez nuela nire burua ezagutzen konturatu nintzen». Hortik aurrera, pixkanaka-pixkanaka nor bere burua ezagutzen joaten dira; hau da, zein den bakoitzaren izaera, jokabidea eta bertuteak ezagutzen hasten dira, baita ingurukoei eragindako kalteez jabetzen ere.

«Barruko piztia zain dago»

«Alkohola utzi baldin baduzu, zergatik jarraitzen duzu bileratara joaten» bezalako galderak noizbehinka entzuten diztutela aitortu dute Zumaiako Alkoholiko Anonimoetako kideek. Erantzuna sinplea bezain zuzena da: «Jakin badakigu zein den gure arazoa eta bileretara etortzeak mesede egiten digu. Noizbait ahuldadeak ematen baldin badigu, horri aurre egiteko indarrak hartzera etortzen gara. Piztia barruan daramagu eta zain dago. Beraz, erne ibili behar dut».

Alkoholiko Anonimoen leloa eta, era berean, epe laburrera ipintzen duten helburua 24 ordu da. Egun batez alkoholik edan gabe egotea; eta horrela, egun bat joan eta bestea etorri. Taldea utzi duenik ere bada, «baina askok berriz edaten bukatzen dute».

Beste kide batek eskerrak ematen dizkie Alkoholiko Anonimoei eta Al-Anon Alkoholikoen Senidei, hauek jorratutako bideagatik: «Nire alaba ikasten ari zen garaian, alkoholismoari buruzko hitzaldi bat eman zuten bere ikastetxean eta horri esker, nire alaba konturatu zen bere aita ez zela mozkor bat, gaixo bat baizik».