Urola Kostako Hitza

Hirugarren urtez jarraian, Galiziako Miño Ibaiaren Nazioarteko Piragua Jaitsierako bizkorrenak izan dira Manuel Busto asturiarra eta Oier Aizpurua zumaiarra. Garaipena lortzeko itxaropenarekin uretaratu zen bikotea, eta aldez aurretik ezarritako helburua betetzeaz gain, lasterketako marka hautsi zuten joan den larunbatean, 01:01:15 denbora eginez. Bigarren postuan, munduko txapeldunorde eta Sellako garaile diren Jorge Alonso eta Santiago Guerrero palentziarrak sailkatu ziren.

Lasterketaren buruan

Estropada osoan zehar aurretik joan zen bikote irabazlea, proba uneoro kontrolatuz. Lasterketak 18 kilometroko luzeera zuen, 5 urjauzirekin, eta nahiz eta hasieran arazo txiki bat izan zuten, ez zien askorik eragin: lehen urjauzian piragua zulatu zitzaien, baina ontzian zeramaten atxikatzeko tresnei esker ez zuten arazo handiegirik izan ura ontzitik atera eta lasterketan jarraitzeko.

Hala, K-2 modalitateko denboraldi hasiera bikaina egin dute Bustok eta Aizpuruak; izan ere, 52. Miño Jaitsiera elkarrekin egin duten lehen proba zen.

Ibaia ur askorekin

Azken egunetako euriaren eraginez, Miño ibaian ur asko ari zen jaisten lasterketa egunean. Ondorioz, antolatzaileek nesken, kanoa modalitatekoen eta kadeteen mailako lasterketak bertan behera uztea erabaki zuten, oso arriskutsua zela argudiatuz.

Senior mailakoek bakarrik parte hartu zuten aurten. Hala eta guztiz ere, seniorrek zirkuitu alternatibo bat egin behar izan zuten. Ibaian ur asko zegoenez, estropada oso bizkorra izan zen eta, ondorioz, Bustok eta Aizpuruak piragua lasterketako marka berria egiteko aukera izan zuten.