Urola Kostako Hitza

Jon Sudupek irabazi du aurtengo Miguel Unamuno Saiakera sariaren euskarazko atala, Hizkuntza ados jartzeko da lanarekin. Bilboko Udalak antolatzen duen lehiaketan bigarrenez gailendu da azkoitiarra, 2004an ere berak irabazi baitzuen, Kant eta uso arina liburuarekin.

Hizkuntza ados jartzeko da saiakeran Sudupek azaltzen duenez, hizkuntzak pertsonen arteko harremanak ulertzeko eta munduaren ikuspuntu bat sortzeko beharrezko tresna dira.

Gaztelaniazko atalean, Pere Ballart eta Jordi Juliak irabazi dute, Sobre islas y penínsulas. Ensayo de teoría sobre la literatura comparada lanarekin. Epaimahaikideen arabera, saiakerak «estilo atsegina erabiltzen du, eta horrek liburua benetako literatur saiakera bihurtzen du; gainera, zientzia lorpen eta definizio, teoria eta modelo ugari aurkezten ditu».

Miguel Unamuno Saiakera saria lehenengoz 1999. urtean antolatu zuen Bilboko Udalak. Euskarazko eta gaztelaniazko lanak saritzen ditzute, eta irabazleei zazpina mila euro ematen dizkiete.

Filosofian aditua

Jon Sudupe (Azkoitia, 1947) Filosofia eta Hezkuntza Zientzietan lizentziatua da. Sortzez azkoitiarra bada ere, urte asko daramatza Zumaian bizitzen, eta irakaslea da ogibidez. Kaleratu dituen obren artean honako hauek daude, besteak beste: Marx (1818-1883) Teoria eta politika (BAK, 1984), Modernitatearen alde (Kutxa, 1991) eta Euskaldunak, liberalak eta komunitatezaleak (BBK-Euskaltzaindia, 1999).