Urola Kostako Hitza

Ia hilabete pasatu da Orioko Herri Ikastolan Ikasys proiektua martxan jarri zenetik. Proiektu honek ikasteko modu berriak biltzen ditu bere baitan, ikasleek ordenagailua erabiltzen dutelako ikasgelan bertan zenbait ariketa egiteko. Hasiera honetan «arazo teknikoak» izaten ari diren arren, «ikasleen jarrera oso positiboa» izan dela adierazi du Ikastolako zuzendari Zigor Saizarrek.

Arazo teknikoak

Saizarrek azaldu duenez, arazo teknikoak izan dituzte lehen aste hauetan, Orion ez ezik baita beste bi ikastoletan ere. Horrek «zaildu» egin du sistema hau erabiliz prestatutako eskolak normaltasunez ematea, baina fase honi dagozkion ezaugarriak horiexek direla adierazi du: «Guri tokatu zaigu esperimentazio fasea egitea eta baditu bere zailtasunak ere, baina aldi berean oso pozik gaude proiektu honetan parte hartzearekin».

Hain zuzen ere, ordenagailuen zerbitzariarekin dituzte arazoak, batzuetan blokeatu egiten delako, eta horrek aldaketak eginarazi dizkie. Hasieran, ikasgai bakoitzean astero 30 minutu egiten zituzten bigarren, laugarren eta seigarren mailako ikasleek, baina arazo horiek direla eta, bigarren eta seigarren mailetako ikasleak sistema honekin ikasgai gutxiago egiten ari dira orain. Laugarren mailako ikasleak dira, beraz, aurreikusitako planari jarraitzen diotenak. Dena den, proiektua martxan jarri aurretik Saizarrek esan zuen bezala, maila horietako ikasle guztiak ari dira sistema hau erabiltzen.

Ikasturte amaiera normala

Ordenagailuekin izaten ari diren arazoek ikasturteko programan aldaketarik ez dutela eragin azpimarratu du Saizarrek, eta ikasturtea «berdin-berdin eta normal» ari direla egiten gaineratu du.

Bestalde, sistema hau erabiltzen dutenean, ikasleak «adi-adi eta kontzentratuta» ikusten dituela adierazi du, eta ikasleak proiektua «interes handiarekin» bizitzen ari direla irizten dio. Zentzu horretan, «oso positiboki» baloratu du Ikasys proiektuaren hasierako fase hau.

Ikastolen Elkarteak hiru ikastoletan jarri du martxan esperimentazioaren aurreneko fasea, eta Orioko Herri Ikastola da hiru horietako bat. Apirilaren 14an hasi eta ikasturtea bukatzearekin batera amaituko da aurreneko fase hau ere. Helburua, proiektuak teknikoki funtzionatzen duen ala ez ikustea da, datorren ikasturtetik aurrera bigarren fase batera salto egin ahal izateko eta sistema berri hau normaltasunez ezarri ahal izateko.