Urola Kostako Hitza

Urtero bezala, aurten ere maiatzaren 8ak ekarri ditu Aizarnazabalera jaiak. Izan ere, gaur ospatuko dute aizarnazabaldarrak Mikel Txiki Eguna. Aurtengoan asteguna tokatu denez, egun bakarreko festa izango da. Hala ere, ekitaldi ugari antolatu dute.

Goiz parterako, Aizarnazabalgo Eskolak Arroa, Oikia, Aizarna eta Aizarnazabalgo ikasleen arteko Eskolarteko Kirol Txapelketa prestatu du. Txikienek hurrengo kiroletan parte hartzeko aukera izango dute: esku pilota, pala, xakea, damak eta lasterketak. Eguardian bazkaria izango dute eta 14:30ean, bazkalostean, LHko 5. eta 6. mailetako finalak jokatuko dituzte. HHkoen lokots bilketa eta lasterketa probak ere orduan egingo dira. Horretaz gain, kirol txapelketari amaiera emateko, sariak banatuko egingo da.

Ondoren, 16:00etan, antolatzaileek parte-hartzaile guztientzako askaria edo merienda prestatuko dute; jarraian, haurrek buruhandietatik iheska herrian zehar ibiltzeko aukera izango dute.

18:30ean, Inaxito 1,2,3 antzerkia izango da ikusgai. Ekimen berri hau Adiskide Bertso Eskolak antolatu du Kutxa Fundazioaren laguntzaz, eta bertso-antzerkia ikusteko aukera izango dute aizarnazabaldarrek. Eguraldi ona eginez gero, herriko plazan egingo da saioa eta, bestela, eskolako soinketa gelan edota frontoian. 19:00etan, berriz, meza izango da Mikel Goiangeruaren parrokian.

Eguna bukatzeko, festa guztietan bezala, ez da musikarik faltako Aizarnazabalen, 19:30ak aldera triki-bertso-txiste poteoa izango baita herriko tabernetan barrena. Iluntzean, berriz, 22:30ak aldera, parrandazaleek dantza egiteko aukera izango dute Kupelarekin.