Urola Kostako Hitza

Aulki mugikorreko denboraldia amaitu du Orioko zortzikoak. Joan den asteburuan jokatu ditu azken bi estropadak Nantesko (Bretainia) Nazioarteko Estropadetan. Biak irabazi dituzte oriotarrek, eta orain traineru denboraldia prestatzen hasiko dira.

Estropadak larunbatean eta igandean izan ziren; larunbateko proba 1.000 metro luzekoa izan zen, eta igandekoa, berriz, 500 metrokoa;bietan Orio nagusitu zitzaion Universität Karlsruhe talde alemaniarrari.

Justu-justu irabazitakoak

Larunbatean 1.000 metroko estropada 02:53,803an egin zuen Orioko zortzikoak, baina bigarren egin zuten alemaniarrak oso gertu izan zituzten, 02:53,979 denborarekin. Ehunenekoen aldeak erabaki zuen, beraz, nor zen irabazlea.

Igandean ere gauza bera gertatu zen; 500 metroko proban 01:23,002 egin zuen Oriok eta 01:23,784, berriz, Universität Karlsruhek.

Talde alemaniarra ez zutela ezagutzen eta «gerra handia» eman dietela aitortu du Orioko entrenatzaile eta arraunlari Gorka Etxeberriak. Hurrengo urtean Orioko Nazioarteko Estropadara etortzera «gonbidatu» dituztela jakinarazi du, gainera.

Kanpokoak ezagutzen

Nantesko Nazioarteko Estropadan aurrenekoz hartu dute parte eta estropaden aurretik beste taldeei buruzko «informazio gutxi» zutela adierazi du Etxeberriak: «Nantesera hemendik kanpoko taldeak ezagutzeko asmoz joan gara, eta aldi berean kanpokoek gu ezagutu gaitzaten ere bai».

Zentzu horretan, Etxeberria gustura agertu da aurtengo denboraldian kanpotarrekin sortutako harremanekin. Denboraldiko gauzarik garrantzitsuenetarikotzat jo du alor hori: «Guk askotan pentsatzen dugu hemen bakarrik egiten dela arraunean, baina kanpora ateraz gero, beste lekuetan ere izugarri egiten dutela ohartzen zara».

Denboraldia, «nahiko ona»

Estropada garrantzitsu askorik irabazi ez badute ere, aurtengo denboraldia «nahiko ona» izan dela uste du Etxeberriak. Emaitzei dagokionez, bi estropada azpimarratu ditu oriotarrak: «Bilbon Astillerori irabazitako estropada», alde batetik, eta «Espainiako Errege Kopan lortutako bigarren postua», bestetik.

Azken honetan, Andaluziako selekzioak hartu zien aurre, baina «haiek Olinpiar Jokoetan parte hartzeko prestatzen» ari direla eta «hain maila altuko taldearen aurrean bigarren geratzea garrantzitsua» izan zela adierazi du.

Talde gaztea, etorkizunekoa

Aurtengo taldea gaztea da eta denboraldi honetan «gehienbat aurrera begirako lana, etorkizunerakoa», egin dutela eta emaitzak «hemendik bizpahiru urtera» ikusiko direla adierazi du Etxeberriak.