Urola Kostako Hitza

Bizkargi Musika Eskolak 15 eguneko Musika Udalekuak antolatu ditu estreinakoz uda honetarako. 4 eta 11 urte bitarteko umeei zuzendutako ekimena ekainaren 23an hasiko da eta uztailaren 4a arte iraungo du.

Bi astean zehar, eta adinaren arabera banatutako taldeetan, musika eta elkarbizitza uztartzeko aukera izango dute umeek, hainbat irakasleren ardurapean. Datorren astelehenean zabalduko dute izena emateko epea, maiatzaren 5ean. Parte-hartzea mugatuta egongo da eta interesa dutenek lehenbailehen eman beharko dute izena astean zehar, ikastetxeko idazkaritzan edo telefonoz, 10:00etatik 12:00etara eta 16:00etatik 18:00etara. Udalekuek 110 euroko prezioa dute, eta familia ugariek %15eko beherapena izango dute.

Goizetan egingo dituzte saioak, 09:30etik 13:30era bitartean, astelehenetik ostiralera. Udalekuak euskaraz izango dira eta Bizkargi Musika Eskolako geletan egingo dituzte.

Proposamen anitza

Xabier Lizasok atzo aurkeztu zien ikastaroa Bizkargi Musika Eskolako ikasleen gurasoei. Ikasleek «metodo praktiko, dibertigarri eta parte-hartzaile baten bidez, musikarekin batera elkarbizitzen» ikasiko dutela adierazi zien gurasoei. «Ikasle gazteek musika ezagutzea, sentitzea, berarekin elkarbizitzea eta musika interpretatzen jakiten ikastea da udalekuen helburua», erantsi zuen.

Musika Udalekuen helburuak hauek dira: umeek behar bezala arnasten ikastea; erritmo eskema ezberdinak garatzea; kantu baten koreografia dantzatzea; gure inguruko soinuak identifikatzea edo abesti baten hitzak eta doinua memorizatzea, besteak beste.

Ikasturtea osatzeko aukera

«Hilaren 20an bukatzen da ikasturtea eta nahi duenak jarraipena emateko aukera ona du Musika Udalekuen bitartez», dio Bizkargi Musika Eskolako zuzendari Maria Jose Arregik. «Oso ekimen interesgarria da eta beste herrietan arrakasta izan du», gaineratu du.