Urola Kostako Hitza

Aurten, maiatzaren 11n egingo da Iñaki Beitiaren Oroimenezko Mendi Martxa. 12. urtez jarraian, Urretxu-Zumarragako Ostadar Mendi Taldeak antolatu du Aizpurutxoko irakaslearen oroimenezko ibilaldia.

Ohi legez, aurtengo mendi ibilaldia Goierri, Deba Garaia eta Urola-Kosta eskualdetan barrena egingo da. Bi ibilbide osatzeko aukera izango da, bat laburra eta bestea luzea. Zirkuitu laburrak 24,5 kilometroko luzera eta 1.300 metroko gainbehera izango du. Ibilbide luzeak, berriz, 54,4 kilometroko luzera eta 2.800 metroko gainbehera edukiko ditu.

Ibilbide luzea egiteko 6:00etan abiatuko dira, Urretxuk eta Zumarragak partekatzen duten Areizaga-Kalebarren enparantzatik. Aurreneko aldiz, ibilbide laburrerako irteera 08:00etatik 08:30era bitartean izango da.

Bi ibilbide berri

Ibilbidearen aldetik ere, aurten ere berrikuntzak prestatu dituzte antolatzaileek. Ibilbide luzeari dagokionez, lehendabiziko aldiz Zerain eta Mutiloako lur-sailetan sartuko da mendi martxa. Bi herriok meatzaritzari lotuak egon dira eta ibilbidean Aizpitako labeak, eta Mutiloako Troia meategiaren ondotik igaroko dira. Mantxola baserriaren ondotik ere igaroko da ibilaldia, Francisco Goya margolariaren arbasoak sortu zireneko etxetik, hain zuzen.

Ibilbide laburrari dagokionez, igoera berri bat sartu dute 12. edizioan. Pagola lepora igoko dira mendizaleak, Leturia eta Kortaberri baserrien ondotik igaroz.

Ibilbide laburraren kontrolak Areizaga-Kalebarren plazan, Samiño gainean, Aizpurutxon, Irimo gainean eta hasierako plazan jarriko dituzte. Anoa-postuak, berriz, Aizpurutxon, Trekutz lepoan eta amaierako plazan egongo dira.

Izena emateko aukera

Izena emateko epea jadanik zabalik da Urretxu-Zumarragako hainbat tokitan eta www.beitia.org webgunean. Mendizaleek Urretxuko Kiroldegian, Zumarragako Ispilla Kiroldegian zein Ostadar Mendi Taldearen egoitzan eman ahal izango dute izena.

Martxaren aurreko egunetan ematen bada, ordaindu beharreko kuota 7 eurokoa da; eta, bestela, egunean bertan emanez gero, 9 eurokoa izango da.

Aurten ere, aurreko urteko zerbitzuen maila mantendu nahi dute antolatzaileek. Horregatik, kanpotik joaten diren mendizaleentzat lo egiteko tokia eta doako gosaria eskainiko dituzte. Lo egiteko lokala Urretxuko Lizeoaren azpian egongo da, eta bertan kokatuko dira behar diren koltxoiak. Lo-zakua baino ez da behar izango bertan lo egiteko. Lokala bezperan 19:30etik aurrera izango da irekita mendizaleei harrera egiteko.