Urola Kostako Hitza

Jose Ramon Iruretagoiena Izeta II.-ak Aimar Irigoienek botatako desafioa onartu zuen. Irigoienek esana zuen larunbatean Tolosako Kantabriko tabernan egongo zela, hedabideen bidez botatako desafio norbaitek onartzea nahi bazuen ere: 150 kiloko harri kubikoarekin 10 minutuko 3 txanda jokatuko nahi zituen, eta 30.000 euroko apustua egiteko prest zegoen. Eta eskualdeko beste harri-jasotzaile bat, Izeta II.a, agertu zen Kantabrikoko hitzordura. Ez, ordea, Irigoienek jarritako baldintzetan.

Izan ere, harri-jasotzaile bakoitzak erronkarako bere baldintzak proposatu zituen. Azkenean, luze eztabaidatuta, akordio batera iritsi ziren.

Erronka handia

Apustua irailaren 28an egitea adostu zuten azkenean, Tolosako zezen plazan. 137,5 kiloko harri kubikoarekin 10 minutuko hiru txanda egingo dituzte eta 20.000 euro egongo dira jokoan. Sarrerekin irabazitako dirua bien artean banatuko dute.

Bi proposamenen arteko erdibidea bilatu behar izan bazuten ere, nahiko gustura geratu ziren adostutakoarekin. Izeta II.-aren hitzetan, «nahiago nuen harri txikiagoarekin jokatu. Hala ere, aurretik harri horrekin marka asko egina naiz. Hamar urte igaro direnez, orain ikusi egin beharko da nola moldatzen naizen. Aimarrek harri-jasotzaile handia dela erakutsi du eta lehia polita izango da».

Aimar Iruretagoinaren ustez, berriz, «oraindik ez daukat inongo harrirekin esperientziarik, horregatik niri kubikoa edo zilindroa berdin zitzaidan. Joxe Ramon harri-jasotzaile handia da eta argi ibili behar da berarekin. Nik uste dut norgehiagoka honetan bere maila erakutsiko duela».