Urola Kostako Hitza

Turismo sektorearentzat garrantzitsuak izan daitezkeen bi egitasmo aurkeztu zituen Turismo zinegotzi Imanol Lasak atzo prentsaurrean. Batetik, datozen lau urteetarako Plan Estrategikoa lantzen hasi direla esan zuen. Eta, bestetik, turismoaren Aholku Batzordea sortzeko asmoa dutela jakinarazi zuen. Aurreikuspenen arabera, 2009 hasierarako Plan Estrategikoaren txostena prest egongo litzateke.

Egitasmo horiek herrian bertan garatzeko asmoa duela adierazi zuen Lasak: «Ez dago kanpoko enpresa batera joan beharrik Plana garatzeko eta Turismo bulegoko teknikarien lanarekin soilik ere ezin da. Eragileen eta herritarren laguntza behar dugu Plan Estrategikoa garatzeko».

Herritarren 'ideia berriak'

Turismo bulegoko arduradunak jadanik hasi dira herriko eragileekin bilerak egiten. «Haien kezkak, beharrak eta ideiak biltzea da asmoa», Planaren oinarriak zehazten joateko. Esaterako, herenegun Malekoiko ostalariekin egin zuten bilera eta «proposamen ugari» egin dutela esan zuen atzo Lasak.

Dena den, inongo elkartetan parterik hartzen ez duten herritarren iritziak ere bildu nahi dituzte. Eta zehazki horretarakoxe kanpaina bat jarri dute martxan. Datozen egunetan, etxe guztietara Festa berriak izeneko txartela iritsiko da Turismo bulegotik. Txartelaren atzealdean herritarrek ideiak idazteko aukera izango dute. Herriko festen, jaialdien edo aisialdiko ekitaldien inguruko ideiak bildu nahi dituzte. Datorren astean kaxa berezi batzuk jarriko dituzte txartel horiek biltzeko. Ideia berriak izeneko kaxa arroxak Turismo bulegoan, Gaztelekuan, udaletxean, Sanz Enean eta Kiroldegian egongo dira. Maiatzaren 16a baino lehen aurkeztu behar dira ideiak eta originalenak bizikleta jasoko du sari gisa.

Lau hankako Aholku Batzordea

Bestalde, Plan Estrategikoa garatzeaz gain, «eguneroko lanari jarraipena egingo dion Aholku Batzordea sortzea beharrezkoa» dela irizten dio Lasak. Horretarako, lau hankako mahaia sortu nahi dute: batetik, Turismo bulegoa egongo litzateke; bestetik, ostalariak; hirugarren hanka Murkilek osatuko luke; eta azkena, berriz, turismo alorreko eragileen ordezkariek. EAEn turismo alorrean sortuko litzatekeen lehen Aholku Batzordea litzatekeela esan zuen Lasak.

Eragileen bileretatik eta herritarren txarteletatik jasotako ideia guztiekin, foro ireki bat egin nahi dute udazkenean zehar.