Urola Kostako Hitza

Saharautz elkarteak bere egitasmoen berri eman du, hemengo herritarren laguntza Saharako errefuxiatuen kanpamenduetara bideratzen jarraitzeko asmoz. Modu horretan, 2008an zehar martxan jarriko dituzten ekimenak jakinarazi dituzte. Eskualdeko herritarrei «sekula baino ozenago» egin nahi izan diete dei, uda sasoian haur sahararrak etxean hartzeko.

Saharautzeko kideek Oporrak Bakean programaren bidez ekartzen dituzte haur sahararrak Euskal Herrira eta hemengo herritarren etxeetan egiten dute egonaldia udan zehar. Zarautzen hasi zen ekimena eskualde guztira ari da zabaltzen urtez-urte eta Saharautzeko kiderik ez dagoen herrietan ere hasi dira lanean. Esate baterako, Aizarnazabalgo eta Azpeitiko udalekin hitzarmenak lotuta dituzte laguntza lortzeko, eta Azkoitiko alkatearekin ere bilduko dira laster.

Ordezkariekin bilera

Bestalde, sahararren osasun eta hezkuntza sareak hobetzeko ekimenak ere jarri dituzten martxan. Saharautz elkarteko kideek «bilera garrantzitsua» izan zuten otsailaren hasieran. Fronte Polisarioko ordezkari Mohamed El Mamunekin eta Aaiuneko gobernadore Mohamed Laminekin elkartu baitziren. «Lehentasunen berri jakin genuen, gure dirua oinarrizko premietara bideratu ahal izateko», adierazi duten Saharautzeko kideek.

Otsaileko bilera haren ondorioz bi proiektu jarri zituzten abian, eta horietako bat sahararrei osasun zerbitzua ematen dien sarea diruz hornitzeko ekimena izan da.

Hezkuntza eta osasuna

Saharautzeko kideek emandako datuen arabera, Aaiun probintzian ospitale bat eta bost osasun etxe dituzte. «Sendagairik oinarrizkoenak falta izateaz gain, mediku eta erizainei ezin diete eutsi. Soldatarik ordaintzen ez zaienez, beste norabait alde egiten dute. Larrialdi egoera hau arintzeko izan da diru laguntza». 10.000 euroko laguntzarekin, mediku eta erizainei aldi baterako gutxieneko soldata ziurtatuko zaie, botikak erosiko dituzte eta gerran zaurituta ospitalean daudenentzat lastaira edo koltxoi berriak erosiko dituzte.

Horrez gain, irakaskuntzan eragiteko asmoa ere badute Saharautzeko partaideek. Mediku eta erizainekin egin bezalaxe, orain irakasleekin ere alor ekonomikoa hobetu nahi dute, «familia aurrera ateratzeko ezinbestekoa baitute gutxieneko soldata».

Oraingoz premiak zehazten ari dira Saharautzeko kideak, diru kopuruak erabaki eta hurrengo bidaia prestatzeko.