Urola Kostako Hitza

Atzo dena urdina zen Zumaian. Eguna zeru urdin-urdinarekin argitu zuen, eta jendea ere, haur, gazte nahiz heldu, hala kaleratu zen. Eguerditik hasi eta gauera bitartean makina bat gozamen izan zuten eskura. Tripa betetzeko, adibidez, olagarro zopa; aurtengo lehiaketa Ramon Chamarrok eta Antton Laskibarrek irabazi zuten. Txosnen egitarauaren barruan, berriz, trikipoteoa eta bazkaria egin zuten hainbat lagunek «amnistia egunean». Haurrek ez zuten askorik jan, ziurrenik, baina egun biribila pasa zuten; goizean Itxas Gainek antolatutako jolasetan haur pila batek hartu zuen parte, Gorritiren animaliekin jolastu ahal izan zuten, eta hori gutxi balitz, arratsaldean Kofradian Birusak erasoan! ikuskizuna izan zuten. Lehiaketa gehiago ere izan zen; Victor Petxarroman nagusitu zen bai botean bai igelaren jokoan.

Musika izan zen atzo izar nagusietako bat. Trikitilariek eta Beheko Plaza eta Azkoitiako Iraurgi Abesbatza abesbatzek alaitu zuten herria goiz partean. Arratsalde eta gau partean, fanfarrea, rock kontzertua eta bestehainbat musika saio izan ziren, tartean Pantxoa eta Peio bikotearena.

Velarde onena bertsotan

Ostiral gauean jokatu zen Zumaiako X. Bertsolari Txapelketa afari jendetsu baten ostean. Buruz burukora Maialen Velarde eta Unai Gijarro iritsi ziren, eta azkenean txapela Velarderentzat izan zen.

Gaur ere hamaika aukera

Goizean Itzurunen egingo den zaldi lasterketarekin hasiko da eguna. Gero Urrezko Aizkora, trainerutxoen estropada, haur festa, erromeria eta gauerdiko bandera jaitsiera izango dira, besteak beste.