Urola Kostako Hitza

Bihartik aurrera Azpeitiko Udala UEMAko, Udalerri Euskaldunen Mankomunitateko, kide izango da. Hala eman dute jakitera Udal Gobernua osatzen duten aldierdietako kideek (EAE-ANV, EA eta Aralar) eta herrian euskararen inguruan lanean ari diren eragileek. Hain zuzen ere, bihar ezohiko udalbatzarra deitu dute «Azpeitiko Udala UEMAn atxikitzea» gai hartuta. 10:00etan izango da, udalbatzar aretoan. Gainera, «udalbatzarrera eta ondoren udaletxeko arkupetan egingo den jaialditxora herritarrak gonbidatu nahi ditugu».

Azpeitian azkenengo urteetan euskararen alde «asko egin da, baina oraindik asko dago egiteko», diote Udal Gobernuko kideek eta euskalgintzakoek. Ildo horretatik, «euskara hizkuntza normalizatua izango bada, konpromisoak hartu behar behar dugu», eta Azpeitiko Udala UEMAn sartzea «norabide horretan beste pauso bat ematea» dela azpimarratu dute.

Herrikoa orain dela urte batzuetakoa baino «egoera hobea» dela diote: «Udal euskara teknikaria eta Euskara Patronatua sortu ziren; Euskalgintzak euskararen normalizazioaren alde egindako lana aipagarria da; Bai Euskarari Akordioa eta EBPNk, bakoitzak bere aldetik emandako pausoak eta elkarrekin aurrera egiteko lortutako akordioa; eragile, merkatari eta hainbat enpresek euskaraz funtzionatzeko hartutako konpromisoak; ikastetxeetan eta hizkuntza eskubideen alde egindako lanak».

Bide horretan, bihar Udalak hartuko duen erabakia «garrantzitsua» da: «Euskara Azpeitiko berezko hizkuntza da, baina oraindik toki askotan herritarrak ezin du euskaraz bizi. Baina, batez ere, euskara Euskal Herriko berezko hizkuntza da, eta horrek bultzatzen gaitu UEMAn sartzera». Gainera, euskararen normalizazioan udalerri euskaldunen eginkizuna «garrantzi handikoa» da: «UEMAren erronka, euskarak ere nagusi izango duen lurgunea izatea da, erdarek bezala».

50 herri UEMAn

Gaur egun UEMA 50 herrik osatzen dute eta Azpeitia Mankomunitatean sartzeak «bultzada handia eman diezaioke egitasmoari». Baina, era berean, Azpeitiarentzako ere UEMAn sartzea «ona» dela azpimarratu dute. «Mankomunitatearen helburu nagusia erdarek betetzen dituzten funtzio guztiak euskararentzat eskuratzea da, gaztelania eta frantsesa beharrezkoak ez izatea normaltasun osoz bizi ahal izateko. Udalerri euskaldunetako eguneroko bizitza, sektore guztietan, normaltasun osoz egin ahal izateko bideak zabaldu nahi ditu. Eta Azpeitian ere hainbat arlotan (komunikabideen kontsumoan, enpresa munduan, justizian, osasungintzan eta abarretan) gabezia handiak ditugu oraindik».