Urola Kostako Hitza

«Zaborra murrizteko neurri askok orokorragoak izan behar lukete»

javier zarraonandia ð- Gipuzkoako Foru Aldundiko Ingurumen zuzendaria

Begi onez ikusi du akordio berria eta datozen urteetarako Hondakinen Plan berritua lantzen ari direla dio

x. aizpurua

«Positiboa da». Halakoxe balorazioa egin du Foru Aldundiko Ingurumen zuzendari Javier Zarraonandiak (Bilbo, 1971) San Markos Udal Elkarteak gaur sinatuko duen hitzarmenaren aurrean. Aurreko agintaldian Zarautzen EAJko zinegotzia izan zenak Foru Aldundiko ingurumen gaiak gidatzen ditu orain.

Zehazki zer lortu da hitzarmen honekin?

Hondakinen Partzuergoan egotea borondatezkoa da udal elkarteentzat. Nahi badute sartu egiten dira eta nahi ez badute ez. Baina, noski, barruan egotea erabakitzen baldin baduzu, gutxieneko ekarpen batzuk egin behar dituzu. Bazkideek gutxieneko kapital bat jartzea erabaki zuten eta San Markosi ekarpen hori onartzea falta zitzaion, eta orain onartu du.

Bestalde, Hondakinen Plana dago. Zein egoeratan dago?

Onartuta dagoen plana 2002koa da, 2002-2016 eperako onartu zena. Orain Aldunditik plana eguneratzen ari gara eta otsailean aurkeztuko dugu dokumentu berritua. Batetik, helburuak zenbateraino bete diren jarriko dugu, eta bestetik, 2016raino luzatuko den plangitza berriaren helburuak finkatuko ditugu.

Eta zeintzuk izango dira plan berrituaren oinarri nagusiak?

Aurkezpen formala Batzar Nagusietan egingo dugu eta ezin dut gehiegi aurreratu. Helburuak lortzeko beharrezkoak diren azpiegiturak jarriko dira: konpostatzeko plantak, transferentzietarako geltokiak (udal elkarte batzuetatikbesteetara hondakinak garraiatu aurretik zaborrak trinkotzeko erabiliko diren guneak), eta errausteko planta ere hor dago.

Hitzarmen berri honetan ez zaio errausketa plantari aipamenik egiten...

Udal Elkarteek egiten duten diru ekarpena Hondakinen Partzuergoan egoteko eta bazkide izateko da. Hortik aurrera, hartu behar diren erabakiak Partzuergoak hartuko ditu.

Eta Partzuergoak oraindik erabaki gabe al dauka errauste planta jarri ala ez?

Partzuergoak oraingoz jarraituko du Gipuzkoa mailan onartuta dagoena. Mementoz, udal elkarte guztiek adostu eta onartutako planetan aurreikusten da errauste planta. Agertzen da, baina azken-azkeneko neurri moduan. Murrizketarako ekimen asko jarri behar dira martxan, konpostajea abiatuz, birtziklapena eta berrerabilpena indartuz... Eta hori guztia egin ondoren gelditzen diren hondakinentzat izango da errauste planta.

Arazo nagusietako bat da biztanleek zabor gehiegi sortzea dutela. Foru Aldunditik zer ekimen jarri duzue abian hori gutxitzeko?

Kontu asko jarri da martxan. Gipuzkoan, norberak etxean konposta egiteko 4.500 tresna banatu ditugu. Horretan, Kataluniarekin konparatuz gure maila hamar aldiz hobea da. Plastikozko poltsen erabilera murrizteko ere egin dira kanpainak. Gu ahalegintzen gara, baina neurri askok globalagoak edo orokorragoak izan beharko lukete, Espainiako Gobernuarenak edo Europako Batasunarenak. Plastikoaren kontsumoan edo produktuen bilgarrietan eragin dezakete horiek.