Herria Zipristinduz

Zestoa “Zipristinik” gabe geldituko da laister. Herria bera, zipristinik gabeko basamortu bihur daiteke, eta haurrak aisialdi egarriz gera litezke betirako. Izan ere, duela hiru urte Zestoan zegoen haurrentzako aisialdi gabezia betetze asmoz sortu zen taldeko kideok, urte hauetan egindako lan gogorraren ondoren, generazio berriei testigua uzteko garaia heldu dela uste dugu.

Testigua uzteko, aurrekariak eta ondorengoak behar dira ordea. Zestoak zipristin berriak behar ditu, bolondres gisa haurrekin jolasteko eta lan egiteko prest dauden gazteak. Horretarako nahikoa da zu zeuk edo zuen lagun kuadrilak astean ordubetetxo bat Zestoako haurrei eskaintzea, jolas nahiz tailerretan.

Trukean zer? Irribarre ugari, eta oraindik garrantzitsuago dena, herri honek behar duen haurrentzako aisialdi esparrua mantentzea, herriak bizirik jarraitzeko alderdi garrantzitsu bat izanik. Askotan bakarka talde batera aurkeztea zaila dela badakigu, baina lagun giroan, eta kuadrilan lan egitera anima zaitezkete. Bete beharreko baldintza bakarrak 16 urtetik gora izatea eta Zestoa eta haurren alde lan egiteko gogoa izatea dira.

Zestoagatik, eta bertako haurrengatik, zipristintzeko prest? Deitu 677 673731 (Larraitz) telefonora, edo bidali e-mail bat zipristinzestoa@hotmail.com helbidera. Zuen laguntza behar dugu lehenbailehen

Bihar, ekainak 23 astelehena, Zìpristinek ere agur esango dio aurtengo kurtsoari!
Horretarako emanaldi eder bat dugu antolatuta!
Bertan, lehenengo Zipristin eguneko argazki rallyko sariak banatuko dira, ondoren haurrek antzerkiak egingo dituzte eta bukatzeko merendolatxo bat egongo da!
Bertaratu nahi duten guztiek jakin dezatela, hau 18:00tan kultur etxeko aretoan izango dela!
Baina hemen ez da dena bukatuko, ostiral horretarako, 27rako zehazki, sorpresatxo bat dugulako antolatuta herriko haur guztientzat!
Horren berri, aurreraxeago emango dizuegu!
Bitartean ongi izan eta bihar elkar ikusiko garelakoan agurtzen gara!

Bai! Ongi irakurri duzue! Gure haurrak artistak bihurtuko dira datozen asteetan! Izan ere, ekainaren 23an, Zipristineko kurtso bukaerako emanaldian, antzerki bat egingo dugu! Hobe esanda, egingo dute! Gure haurrak izango baitira protagonista.
Horretarako, ostiral honetan eta datorrenean, antzerkirako gidoi bat idatzi beharko dute! Beraz, hasi pentsatzen ze gai landuko duzuen!

Gaur musikaren gaia landuko dugu Zipristiñen! Eta horren inguruko hainbat ariketa eta jolas dibertigarri egingo ditugu!

Bihar, maiatzak 1 osteguna, bigarren Zipristin eguna ospatuko dugu.
Lehenengo, parte hartzaileei hamaiketakoa emango diegu eta ondoren argazki rallyarekin hasiko gara. Guk gai batzuk emango ditugu eta haurrek gai horien inguruko argazkiak atera beharko dituzte. Esan beharra dago, argazki onenek sariak izango dituztela.
Arratsaldean berriz, 16:30ean hasita, mihiluze lehiaketa izango dugu. Bertan froga desberdinak egongo direlarik. Finalistek begiraleen kontra lehiatu beharko dute. Eta hemen ere, noski, irabazleek sariak izango dituzte.
Besterik gabe, ekintza hauetan parte hartzera gonbidatzen ditugu herriko haur guztiak!
Bertan ikusiko garelakoan!