Urola Kostako Hitza

Atzo arratsaldean eskualdeko arraunlariak izan ziren nagusi Donostiako Kontxako badian. Bertan jokatu zen Gipuzkoako Txapelketa, eta Zumaia-Getariako neskek zein Orioko mutilek irabazi zuten txapelketa. Gizonezkoetan Zumaia laugarren izan zen eta Zarautz, berriz, bosgarren. Ondorioz, azken honek ezingo du parte hartu Euskadiko Txapelketan, aurreneko laurak sailkatzen direlako lehiaketa horretarako. Bai Orioko entrenatzaile Joxean Olaskoaga 'Aizperro', bai Zumaia-Getariako arraunlari Leire Antia "oso gustura" agertu dira atzo lortutako garaipenekin. Oriotarrek "konfiantza eta lasaitasuna berreskuratu" dituzte garaipen honi esker, eta bihar Galizia aldera "ilusionaturik" abiatuko dira. Hala ere, han irabaztea "zail" ikusten du Olaskoagak, "Urdaibai eta San Pedro gogor dabiltzalako". Antia eta bere taldea, berriz, datorren ostegunean jokatuko duten Euskadiko Txapelketara begira daude. Hura jokatu ostean, irailean Kontxako Banderan ere izango dira eta ordura arte elkarrekin entrenatuko dira bi herrietako arraunlariak.