Urola Kostako Hitza

Atzoko udalbatzarraren bukaeran adierazi zuen Batera Talde Independenteko zinegotzi Julen Garatek, bere taldearen azken bilkura izango zela. "Bederatzi urtez izan gara oposizioan eta pazientzia handia erakutsi dugu, baina pazientzia agortu egiten da. Ez du merezi horrela jarraitzea eta utzi egingo dugu", esan zuen Garatek. "Gai asko pilatu dira (Antonio Oteiza Fundazioarena, Aurrekontu Parte-hartzaileena...) eta ez dira gauza normalak", erantsi zuen. Udal Gobernuak "esandakoak ez dituela betetzen" argudiatuta utziko ditu Baterak Udalean dituen bi aulkiak. EAJko alkate Asier Aranbarrik erabakia errespetatzen duela adierazi zien Baterako zinegotziei, baina erabakia EAJren gain ez jartzea eskatu zien.

Aste Santuaren ondoren egingo du batzarra Batera Talde Independenteak. Orduan erabakiko dute etorkizunean nola jokatu. Hiru aukera aurreikusten dituzte: udalbatzarretan parte hartu ez baina batzordetara joatea; udalbatzarretan eta batzordetan parte ez hartzea; edota aktak bakarrik jasotzea eta egoera aldatzen den arte itxoitea.