Urola Kostako Hitza

Gipuzkoako Foru Aldundiak joan den astean onartu zuen datorren urterako aurrekontua eta EB-Berdeak alderdiak akordioa lortzeko bidean egin dituen «ekarpenak» nabarmendu nahi izan ditu. «Ekarpen sendoa, nabaria eta estragetikoa» egin dutela diote alderdikideek eta datozen hilabeteetan eskualdean «eragin zuzena» izango dutela irizten diote. Hori guztia arrazoitu eta azaltzeko prentsaurrekoa eman zuten joan den astean Gipuzkoako Batzar Nagusietako batzarkide Arantxa Gonzalezek eta Zarauzko zinegotzi Ubaldo Ortiz eta Mariana Aranburuk.

Urola Kosta eskualdeari eragingo dioten proiektuetatik hriu azpimarratu nahi izan dituzte EB-Berdeetako ordezkariek.
Etxebizitza babestuak
Urola Kostari dagokion Lurralde Zatiko Planean, Iraetako lurren erreserbako baldintzetan, «unean-unean aldatzeko» aukera izango dela esan zuten, eta horren ondorioz etxebizitza gehiago egiteko aukera sortuko da. Dena den, nekazaritza intentsiborako aukera ere mantenduko da.
Egindako aldaketa honen ondorioz, Eusko Jaurlaritzarenak diren 26,2 hektareatan «etxebizitza eskaintza interesgarria garatzeko» aukera izango da. Ekimen hau «garrantzitsutzat» jotzen du EB-Berdeak alderdiak eta «eskualdean eragina» izango duela aurreikusten du. Dena den, «inguruko balio naturalei lehentasuna emang oo zaiola» aipatu dute, lursail horretan hezegune ugari dagoelako.
Azkoitiko Insausti eremuan Aldundiak dituen lurrak Jaurlaritzari utziko dizkio azken honek BOEak egin ditzan. Orain arte erakutsitako asmoen arabera, Aldundiak etxebizitza tasatuak eraiki nahi zituen Insaustin, baina «akordio pozgarri» honekin 110 BOE egingo direla aurreikusi dute EB-Berdeetako kideek.

Autobideko zarata gutxituz

Zarautzen, A-8 autobideko pasabideak sortzen duen zarata gutxitzeko ere neurriak hartuko dituzte, zeregin horretara 160.000 euro bideratuz. Hain zuzen ere, soinua gutxitzeko pantailak jarriko dituzte ordainlekutik hasi eta Itxas Mendi parera arte. Berez, Orokietako erakin berriko proiektuan aurreikusitako «neurri zuzentzailea zen, baina bete ez zenez» aurrekontuetara eraman dute proposamena eta aurrera egin du.

Bestelako datuak

Beste zenbait puntu ere aipatu zituzten agerraldian. Besteak beste, etxebizitza hutsei %150eko gainordaina ezarriko zaiela, etxez-etxeko laguntzaren aurrekontua handitu egingo dela, garraio publikoan eta industrialdeetarako garraio kolektiboan hobekuntzak egingo direla eta lan arriskuen prebentziorako programa abiatuko dela esan zuten.