Urola Kostako Hitza

Haur-eskola zerbitzu handituko dutela adierazi du Zumaiako Udalak. Horretarako modulu berriak jarriko ditu Arrangoletako plazan eta, hala, 29 haurrentzako lekua izango dute. Eraikitze lanak berehala hasiko dira eta martxoan martxan jartze espero dute Udal ordezkariek.

Aita Mari kaleko haur-eskola txikia geratu dela eta, Zumaiako Udalak zerbitzu hori emateko hiru modulu berri eraikiko ditu Arrangoletako plazan. Antza denez, geroz eta herritar gehiago ziren haur-eskolako zerbitzua eskatzen zutenak, baina ez zegoen eskatzaile guztientzako tokirik.

Udalak adierazi duenez, “aukera ezberdinak aztertu genituen, eta azkenean moduluak jartzea erabaki dugu. Deban gauza bera egin dute eta bertako arduradunekin zein Eusko Jaurlaritzako Hezkuntza Saileko arduradunekin hitz egin ondoren, sistema bera erabiltzea adostu dugu”. Bi modulu 0-1 urte bitarteko neska-mutilentzako izango dira –horietako bakoitza zortzirentzako egongo da egokituta–, eta bestea, 1-2 urte bitartekoentzat. Azken horrek 13 neska-mutil har ditzake.

Modulu berriak eraikitzeko lanak lehenbailehen hasiko direla aurreratu dute Udal ordezkariek, eta atzerapenik ematen ez bada, datorren urteko martxotik aurrera martxan jarriko dutela jakinarazi dute. Datorren urteko martxoan zabalduko dituzten moduluetan izena emateko epea urtarrilean zabalduko da.

Bestalde, Aita Mari kaleko haur-eskolan zaharberritze lanak egingo dituztela iragarri dute.